Грчкиот премиер Кирјакос Мицотакис изјави дека ќе лансираат дронови и ќе постават шумски сензори за температура за да се подобри превентивното гаснење пожари, откако се соочи со големи критики од климатските активисти за разорниот пожар во регионот Еврос, кој гори веќе две недели.
Вкупната површина изгорена од шумскиот пожар во областа надминува 93.500 хектари, според сателитски податоци од Службата за брзо мапирање Коперник на Европската комисија обработени од Националната опсерваторија во Атина и порталот Метето, јави дописничката на МИА од Атина.
Пожарот во Еврос веќе 16 дена е вон контрола, а денеска активни се две жаришта. Во гаснењето интервенираат 582 пожарникари со 122 возила, 16 пешадиски тима, осум авиони и два хеликоптери.
Летните шумски пожари се вообичаени во Грција, но владата кажа дека екстремните суви, жешки и ветровити услови, што се поврзуваат со климатските промени, ги направиле многу полоши оваа година.
Екологистите ги обвинија грчките власти дека повеќе пари трошат на гаснењето отколку на превенцијата. Мицотакис возврати дека оваа година биле потрошени десетици милиони евра на спречување пожари, но тоа очигледно не било доволно.