Победа не е некој да се осуди, победа е да сфати дека згрешил, порача Зоран Мијалков, самохраниот родител на две деца со аутизам кои деновиве се мета на говор на омраза на социјалните мрежи од Ранко Србакоски. Пораките од типот „дека децата со посебни потреби се товар на државата и извор на органи за здрави деца“ се жални и грозоморни. Мијалков вели ако некој не може да помогне, барем да не им одмага на семејствата кои имаат тешка битка. И денеска го повика Србакоски, но и политичарите да минат барем еден ден со семејство кое има дете или деца со посебни потреби, инвалидитет или ретка болест.
Голем дел од родителите се откажале од битката за остварување на правата на нивните деца. Најжално е, како што вели Мијалков, во ваквите случаи рацете ги меша политиката, а тешките последици ги трпат родителите и нивните деца со посебни потреби, инвалидитет или ретка болест. Тој спасот го гледа во заминување од земјава, а во наредниот период неколку здруженија ќе поднесат и тужба против државата со судот за човекови права во Стразбур.
Според Мијалков помошта ја има на хартија, но во реалноста ситуацијата е многу постравична. Тој денеска во штипската полициска станица ја потпиша кривичната пријава за говор на омраза и насилство на социјалните мрежи против Ранко Србакоски, за кого во моментов има две вакви пријави, а првата ја поднесе Првата детска амбасада „Меѓаши“.
Викторија Јованова
