Во турската амбасада во Скопје се одржува гласањето за вториот круг од претседателските избори во Турција на кои кандидати се актуелниот претседател Реџеп Таип Ердоган и опозицискиот кандидат Кемал Киличдароглу. Повеќе десетици гласачи беа на гласачкото место, кога ТВ Телма беше таму.
Во првиот круг, на таа локација, гласале 1.765 турски граѓани и во амбасадата во Скопје, победи опозицискиот кандидат Киличдароглу. Меѓу гласачите во Скопје, најмногу има студенти од Турција кои студираат во Македонија, работници во градежниот сектор и бизнисмени.
Гласањето во турската амбасада во вториот круг се спроведува од вчера и трае два дена. По завршување на гласањето, избирачките ливчиња се ставаат во жолти пликови и се праќаат во Турција каде се пребројуваат на изборниот ден, односно на 28 мај.
Во првиот круг на претседателските избори, Ердоган освои над 27 милиони гласови и победи со пет проценти разлика пред противкандидатот Киличдароглу. Ердоган се бори за трет мандат, додека опозицијата се обедини во обид да го урне и да поништи дел од неговите одлуки со кои Турција стана претседателски систем.
