За неполн час, управниот одбор на Академијата за судии и јавни обвинители одлучи дека, досегашната директорка, Наташа Габер Дамјановска треба да остане во оваа фотелја уште четири години.
За неа гласаа осум од членовите, само претставничката од Министерството за правда, Валентина Шаурек, беше воздржана. За нејзиниот противкандидат, Ненад Савевски, од Основниот кривичен суд-Скопје, петмина беа против, тројца за, а еден беше воздржан. За судијата Андреј Димовски од Граѓанскиот суд Скопје, чија кандидатура пристигна последна, по пошта, сите гласаа против.
Судијката Емилија Шопар-Јованова, отпадна од конкуренција, затоа што немаше меѓународно признат сертификат за познавање на англиски јазик, што беше услов во огласот.
Пресудно за реизборот на Габер, биле нејзините резултати во досегашното работење.
Габер-Дамјановска е поранешна уставна судијка и директорка на Институтот за социолошки и политички правни истражувања, а за директор на Академијата прв пат беше избрана во ноември 2018 година.
Далиборка Демјанска Цветановска