За огромни 76 проценти пораснал бројот на починати од Ковид-19 во последната недела. Ако минатата недела битката со вирусот ја загубиле 55 пациенти, од 17 до 23 јануари овие статистики се речиси дуплирани, со 97 починати. Овие податоци се дел од Извештајот на институтот за јавно здравје од каде што информираат и дека најголемиот дел од починатите пациенти се на возраст над 60 годишна возраст, но има и помлади – двајца од 30 до 39 години, двајца и од 40 до 49 годишна возраст. За периодот кој го опфаќа извештајот забележан е пораст на бројот на позитивни, со 11.610 новопотврдени случаи од над 39 илјади тестови. Тоа е за 4,5% повеќе споредено со минатата недела, а инфицирани има во сите градови низ државата. Се бројат и за 25% повеќе реинфекции – или 1559 пациенти по вторпат добиле позитивен ПЦР-тест.
„Се забележува зголемување на бројот на заболени кај речиси сите возрасни групи, со најголемо зголемување кај возрасната група од 0 до 9 години (31%) и возрасната група над 60 години со зголемување од 17% во однос на претходната недела. Се регистрира намалување на бројот на заболени кај возрасните групи од 10 до 19 години.“
Во меѓувреме, Кризниот штаб го направи претпоследниот чекор за воведување на нова мерка. Испратија до Владата предлог за скратување на времето за домашна изолација. Лицата коишто добиваат позитивен ПЦР-тест и се водат како асимптоматски случаи, да бидат 7 дена наместо 10 дена во домашна изолација. Од Министерството за здравство побаравме одговори околу прашањето – во која група ќе спаѓаат лицата кои имаат полесни симптоми и имаат потреба од симптоматска терапија или само витаминска терапија, но нема одговор. Велат дека ќе почекаат одлуката да помине на Влада, а потоа ќе бидат прецизирани сите детали. Во меѓувреме состојбата низ државата полека станува критична, среде бранот предизвикан од варијантата Омикрон. Има места како што е случајот во Штип, каде што заразени се голем број на лекари и медицински сестри од болницата. Притисокот на сите здравствени установи е голем заради огромниот притисок за тестирање и правење крвни анализи.
Петар Догов
