Човечка грешка или непрофесионалност на возачот. Ова е се поизвесно дека ќе се утврди како причина за автобуската несреќа во Бугарија, во која во македонски автобус на Беса Транс загинаа 45-мина македонски државјани. Ова доаѓа после денешната изјава на директорот на националната истражна служба и заменик главен обвинител Борислав Сарафов за БНТ. Според него еден професионален возач морал движењето да го прилагоди според условите на патот и покрај тоа што автобусот се движел во рамки на дозволените 120 километри на час.
Според обвинителот во никој случај нема причинско последична врска меѓу катастрофата и лошата сигнализација на патот. Вели до некаде сигнализацијата требало да ја олесни состојбата за возачот, но тој требало да биде повнимателен, да вози со прилагодена брзина и поконцентрирано. Тоа што речиси на средината на патот и веднаш после свиокот на десно се наоѓа банкината на која буквално се насукал и таа распарчила дел од автобусот, според бугрските обвинители не би требало да е причина. Сепак вели ќе ги почека клучните вештачења судско медицинското, автотехничкото и пожарно техничкото кои се комплексни но ќе ги утврдат конкретните причини за несреќата.
Вештачењата за несреќата се очекува да бидат готови до 24 ти декември кога е и Божиќ во Бугарија. Во меѓувреме македонското обвинителство ништо не открива за тукашната истрага за да не се наштетело.
Предметот кој се однесува на работењето на правниот субјект – организатор на патувањето, како и постапувањето на други надлежни органи, е во фаза на предистражна постапка во рамките на која интензивно се преземаат дејствија за утврдување на фактите и евентуална кривична одговорност.
Во несреќата која се случи на 23 ноември загинаа 45 мина од кои 12 деца, а сите се враќаа од туристичко патување во Истанбул. Автобусот кој се движел на автопатот Струма удрил во металната преграда која го раздвојува коловозот од одморалиштето, се запалил и застанал на во лево меѓу две банкини. Изгоре брзо а од пламенот се спасија само 7 мина патници. Туристичката агенција Беса Транс и нејзиниот сопственик Беким Хаџиу во Бугарија не се под истрага,
Билјана Николовска