Претстава која коментира, опоменува и критикува низ слатко- горчлив хумор. Вака накратко може да се опише политичката сатира „ Птица со главата меѓу нозе“, чија слоевитост во себе ги обединува темите за пандемијата, изолацијата, бескрајното исчекување за влез во Европската унија, уништените животи и професии во транзицијата, но и отсуството на свест за животната средина и стравот од климатските промени.
Птицата е симбол на слободата, лета кај сака. Ама, кога главата и е меѓу нозе, тешко ќе лета. Така што има голема врска со нас, со нашава татковина, нашава преубава татковина, вели авторот и режисер на претставата Коле Ангеловски.
Претставата зборува за условите што ги создава младиот Климент, за да на својата свршеница од странство , кога ќе дојде, во име на љубовта и прикаже подобри околности од реалните.
Физички се чувствуваме клаустрофобично поради пандемијата најмногу, а и поради некои други секојдневни геополитички хирови. Тоа ми влијаеше интуитивно, повеќе потсвесно, на градењето на улогата, вели актерот Стефан Вујисиќ.
Толкувајќи повеќе или помалку, типизирани рољи , во претставата настапуваат бардовите на македонската комедија, заедно со актери од средната и младата генерација.
Ние сме навикнати на негување на една емоција, на негување на нешто што е поврзано со театарот, со доживување, не преживување, вели актерот Ѓокица Лукаревски.
Со оваа претстава Коле Ангеловски слави 6 децении уметничка работа, а вечерашната праизведба ансамблот ја посвети на починатата првенка на Драмски, Сабина Ајрула- Тозија.
Сотир Трајков