Болниците по две години пауза конечно испратија млади лекари на специјализации. Од пред еден месец 20 лекари од источниот регион конечно заминаа да специјализираат на една од гранките, кои се дефицитарни во нивните болници. Тоа се младите лекари, кои секојдневно помагаа во битката со коронавирусот. Штипската Клиничка болница како регионален центар годинава доби 12 специјализации за ортопедија, анестезиологија, инфективно, неврологија, пластична хирургија и кардиологија.
Сепак во штипската Клиничка болница и понатаму ќе недостасуваат млади лекари, како и специјалисти поради заминување на лекарите во пензија. Недостатокот од стручен здравствен кадар најмногу се чувствува на ортопедија, анестезиологија и инфективно, а за наредната година планирано е вработување на уште десет млади лекари. На крајниот исток во Делчево, конечно на специјализација заминаа тројца лекари, а за наредната година планирани се уште две.
Во кочанската болница, во моментов на специјализација се 16 лекари, од кои од октомври се заминати петмина. Директорот на кочанската болница Александар Серафимовски вели дека на специјализација испратиле лекари за одделите анестезиологија, хирургија, радилогија и интерно, но болницата годинава остана без единствениот инфектолог, кој замина во пензија. Се надева дека наредната година ќе ја добијат специјализацијата, во меѓувреме за ковид болните ќе се грижат лекарите од сродните гранки, со помош и телефонски консултации со тројцата штипски инфектолози.
Викторија Јованова
