Министерството за здравство се уште не назначило нови директори на болницата во Тетово, каде изгореа 15 луѓе во пожарот кој ја зафати модуларната ковид болница. И покрај тоа што се чекаше изборите да завршат, бидејќи во предизборен период е забрането промена на функционери, сепак од министерството за Телма потврдуваат дека нови директори нема, а за старите велат дека дале неотповиклива оставка, но не информираат дали е прифатена.
„Оставките на директорите се неотповикливи. Следува избор на нови директори“, кусо одговараат од Министерството за здравство.
После пожарот во модуларниот ковид центар двајцата директори Флорин Бесими и економскиот Артан Етеми до Министерството ги поднесоа своите оставки. Бесими е брат на министерот за финансии Фатмир Бесими а на позицијата в.д. директор е веќе 11 години. И министрите Венко Филипче и неговиот заменик Илир Хасани, си поднесоа оставки, но премиерот Зоран Заев не ги прифати. Во пожарот изгореа 12 пациенти, 2 роднини на пациенти, а една пациентка починала уѓте пред да започне пожарот. Истрагата се уште не открила ништо за тоа кој е виновен за трагедијата.