Државната изборна комисија верува дека во вториот изборен круг нема да ги има гужвите и недоразбирањата од првиот круг, посебно во делот на употребата на апаратите за фингерпринт. Комисијата донесе посебни препораки кои треба да им послужат на избирачките одбори за забрзување на постапката за гласање. Според овие препораки, отисокот на гласачот ќе се проверува само два пати – еднаш со десниот и еднаш со левиот показалец. На помош остануваат и 400 технички лица. Во текот на денот, ДИК е отворена за приговори за заштита на гласачкото право, а претпладнево донесе одлуки за дваесетина што пристигнале вчера и денеска.
Пред утрешниот втор круг гласање, Ангела Симоновска од Зелениково испрати приговор до ДИК за заштита на нејзиното избирачко право. ДИК го разгледа и отфрли, бидејќи ова лице веќе е запишано во Избирачкиот список и нејзиното право на глас воопшто не треба да биде доведено во прашање. Ова е еден од 24-те приговори од гласачи за кои Комисијата донесе одлука во итна постапка.
Меѓу двата изборни круга, спроведени се дополнителни обуки за избирачките одбори. ДИК донесе и посебни препораки, имајќи ги предвид пропустите направени во првиот круг. Во избирачките места кадешто има запишано поголем број избирачи или има повеќе избирачки места групирани во еден ист објект, ДИК препорачува член на одборот да ги пречекува гласачите пред објектот и да ги распоредува, а на местото за гласање континуирано да се пуштаат онолку гласачи колку што има паравани.
Во вториот круг, право на глас имаат околу милион 354 илјади гласачи, бидејќи останатите избраа градоначалници во првиот круг. Ќе се гласа во 44 општини плус во градот Скопје. Гласовите се бројат од нула, а победник е кандидатот што ќе освои најмногу гласови. Прегласување на првиот круг има на едно избирачко место во Дебар и на едно во Шуто Оризари. Нема гласање во Маврово-Ростуше и во Центар Жупа – таму ќе се повтори целата постапка со распишување нови избори поради недоволен одзив од гласачите.
Соња Николовска