Претреси во објекти во сопственост на поранешниот премиер Никола Груевски и поранешниот министер за транспорт и врски Миле Јанакиески утринава се извршени во Скопје и Прилеп.
Од Јавното обвинителство посочуваат дека утрово бил извршен претрес во објект на Миле Јанакиески во Прилеп, како и во станови на Никола Груевски во Скопје во врска со предметот „Плацеви на Водно“.
По барање на Основното јавно обвинителство за гонење на организиран криминал и корупција денеска е извршен претрес во повеќе објекти. Претресот е во рамки на истражните дејствија во предметот во јавноста познат како „Плацеви на Водно“, информира во соопштение Јавното обвинителство.
Од ЈО најавуваат дека Основното јавно обвинителство за гонење на организиран криминал и корупција продолжува во континуитет да презема дејствија во насока на целосно расчистување на предметот.
Во случајот „Плацеви на Водно“ се осомничени поранешниот премиер Никола Груевски, како и Ристо Новачевски, Сашо Мијалков, Јордан Камчев, неговата мајка Ратка Камчева и Ненад Јосифовиќ.
Токму поради плацевите на Водно пред две недели во притвор беше спроведен бизнисменот Јордан Камчев кој е осомничен за кривичното дело „перење на пари“.
Во случајот „Плацеви на Водно“, покрај Никола Груевски, осомничени се и Ристо Новачевски, Сашо Мијалков, Јордан Камчев, неговата мајка Ратка Камчева и Ненад Јосифовиќ.