Покачена стапка на смртност и пациент во старосната граница од 20 до 29 години помеѓу починатите од Ковид-19. Британската мутација на вирусот присутна во осум градови.
Ова се податоци од последниот извештај на Институтот за јавно здравје кој го опфаќа периодот од први до седми февруари.
Загрижувачките податоци на Институтот во однос на смртните случаи се регистрирани во 21 град.
Институт за јавно здравје: „Пријавени се 66 смртни случаи од 21 град, со зголемување од 3,1% во однос на минатата недела. 58 лица биле над 60 години, 5 лица на возраст од 50 до 59 години и по едно лице на возраст од од 40-49, 30-39 и 20-29 години. Во текот на минатата недела до ИЈЗ се пријавени 649 материјали кои биле секвенционирани за присуство на „британскиот“ сој на Корона вирус.“
Најголем број од регистрираните случаи со британската мутација се откриени во Охрид, Прилеп и Кавадарци. Примероците се анализирани во три лаборатории – онаа на Институтот за јавно здравје, во лабораторијата на Жан Митрев и во МАНУ.
Токму во лабораторијата на МАНУ во последниот период се детектирани поголем број на нови варијанти, кои претходно ги немало кај пациентите во нашата држава.
Институтот за јавно здравје ова го толкува како континуиран влез на позитивни лица со мутиран Ковид, од странство.
За четири проценти е зголемен бројот и на нови позитивни случаи – 2120 за една недела, во 34 градови.
Петар Догов