Судството, корупцијата, Ковид-19, животната средина, енергетиката и марихуаната се дел од амбициозниот владин план за идната година, наречен „Акција 21-за европски стандарди дома„. Планот предвидува европеизација на државата и покрај блокадата од Бугарија.
Приоритет број 1 за идната година ќе биде прочистувањето на правосудството.
На почетокот на годината се очекува да почне и ЕУ мониторингот на судските случаи од висок профил, околу 50 предмети годишно, во кој ќе учествуваат стручни лица од странство и домашните експерти ангажирани од ЕУ и ОБСЕ.
Од областа на енергетиката, Заев го најави проектот со кој термоелектраната Осломеј ќе се замени со фотонапонска електрана, а за АД ТЕЦ Неготино во првата половина на годината ќе се оцени дали ќе се продава или ќе се гради нова гасна електрана на истата локација. Од идната година, тврди дека и официјално започнува изградбата на гасоводот помеѓу Македонија и Грција и гасификацијата на државата. Пописот е најавен за напролет, паралелно со борбата со дезинформациите.
Меѓу приоритетите е и легализација на марихуаната, за што Заев вели дека ќе почне широка дебата откако ќе се дозволи извоз на цвет од канабис за медицински цели со измени на Законот за контрола на опојни дроги.
Нови лаги за стари проекти, најавени уште пред четири години, вака ВМРО ДПМНЕ го оценија владиниот акциски план.
Стартот на акцискиот план е најавен веднаш по Нова година.
Далиборка Демјанска Цветановска