Американскиот Сенат е во финални подготовки за гласање на контроверзниот закон на претседателот Доналд Трамп кој предвидува големи даночни олеснувања и кратења во државната потрошувачка. Законот, кој брои околу 940 страници, содржи и нови средства за националната одбрана и зајакнување на депортациите, а се очекува конечната одлука да биде донесена утрово.
Сенаторот Роџер Маршал од Канзас изјави дека Републиканците, кои ја имаат контролата и во Претставничкиот дом и во Сенатот, веруваат дека имаат доволно гласови. Демократите, пак, се силно против и нудат десетици амандмани во обид да го променат или блокираат законот, кој се разгледува преку процедура наречена „vote-a-rama“, маратонско гласање за секој предложен амандман.
Сенаторот Марк Кели од Аризона изјави дека целиот демократски блок е решен да го спречи ова законско решение. Доколку законот мине во Сенатот, ќе треба да биде изгласан и во Претставничкиот дом пред претседателот Трамп да може да го потпише и да стане официјален. Претседателот побара од Републиканците да ги одложат празничните одмори и да го завршат гласањето до 4 Јули, Денот на независноста.