Делегации на САД и на Украина почнаа разговори во Саудиска Арабија. На дневен ред на состанокот се најде и предлог за заштита на енергетските објекти и критичната инфраструктура, објави украинскјиот министер за одбрана, Рустем Умеров на Фејсбук.
Умеров, кој ја предводи делегацијата на Киев, во објавата наведе дека спроведува директива на претседателот Володимир Зеленски за „постигнување на праведен мир и да се засили безбедноста на Украина“.
Денешниот состанок претходи на разговорите меѓу делегации на САД и на Русија закажани за понеделник, исто така, во Саудиска Арабија. Денешните и утрешните состаноци доаѓаат по низа одвоени разговори на Американците со украински и руски претставници во кои Киев го прифати предлогот на САД за 30-дневен прекин на огнот.
Соединетите Американски Држави се надеваат дека ќе се постигне широко примирје во рок од неколку недели, надевајќи се на мировен договор до 20 април, објави „Блумберг“, повикувајќи се на добро информирани извори во процесот.