(ФОТО ИЛУСТРАЦИЈА) Откако заврши прегласувањето во селото Ларце каде со доволна разлика за уште еден мандат победи коалицијата “Вреди”, на партиската прослава имаше повеќе истрели од огнено оружје. Истрелите и опасното дивеење со пиштоли беше регистрирано и од повеќе новинарски екипи на терен.
МВР ден по изборите, не извести за инцидентот, а во денешниот билтен дури во попладневното дополнување на регистрирани настани, МВР “откри” дека имало таков постизборен инцидент.
-На 23.05.2024 во Полициско одделение Групчин е пријавено дека по завршување на изборниот процес при прегласувањето во тетовско Ларце на 22.05.2024, при прославата било пукано со огнено оружје. Се преземаат мерки за расчистување на случајот, стои на последното место во билтенот на МВР, веднаш зад пријава за напад на улично куче, оваа информација за употреба на пиштоли.
Засега МВР се уште не откри кој пукал и се уште нема одземено ниту едно парче оружје.
Слични инциденти имало и во претходни изборни циклуси, а во 2021-ва, по локалните избори во Чаир, еден од сторителите на вакво дело беше откриен и казнет преку признание на вина со парична и условна казна. Оружјето тогаш не беше пронајдено, но беше поништена дозволата за оружје на пиштолџијата кој со куршуми среде толпа славеше изборна победа на плоштадот Скендербег.