Протестите на Синдикатот на УКЛО имаат исклучиво граѓанска димензија, а не предизборна како што обвинува техничкиот премиер Талат Џафери, реагираат преку соопштение од синдикалната организација на битолскиот Универзитет. Демантираат дека доцнеле со постапката за потпишување на Колективниот договор за што приложија и документи дека Синдикатот е формиран во 2022 година, а барањето го доставиле во мај лани.
„Синдикатот на вработните на УКЛО се дистанцира од било какви политички влијанија, посебно во предизборен период во кој што се одвива оваа синдикална борба, не по вина и избор на синдикатот, туку според последователниот временски развој на процесот за потпишување на Колективниот договор“, пишува во демантот Саша Дукоски, претседател на Синдикатот на УКЛО Битола.
Претходно Џафери на прес-конференција обвини дека пет државни универзитети задоцниле со формирање на синдикатите и доцна ја доставиле документацијата за Колективните договори, кои не можат да се потпишат по распишување на изборите. Смета дека протестите имаат политичка заднина, и рече дека по примерот на Колективниот договор на УКИМ, лесно може да се дојде до решение, но по изборите.
„Решението е да продолжи постапката по изборите. Искуствено оние слабости што ги имаше барањето на УКИМ веќе се надминати, полесно и побрзо ќе се заврши процедурата. Тоа е решението, нема друго“, рече техничкиот премиер Талат Џафери.
УКИМ и Собранието потпишаа Колективен договор во 2022 кој почна да се применува од 1 јануари годинава. Вработените во петте државни универзитети во Битола, во Охрид, во Тетово, во Штип и „Мајка Тереза“ во Скопје, завчера протестираа, затоа што велат се дискриминирани имаат иста дејност, статус и одговорност со нивните колеги од УКИМ, чии плати ќе бидат поголеми за над 20 проценти.