Тим од стручни лица ќе им помага на учениците од „Песталоци“ да ја пребродат загубата и овој процес ќе трае во следниот период. Ова го наведува Министерството за образование во кусо соопштение. Од МОН изразија благодарност до кадарот на училиштето за совесното постапување и алармирање на семејството на 14-годишната Вања дека отсуствува од настава. Тоа што недостасува во ставот на министерството, е како ќе се делува и во другите училишта, за случајот кој е трауматичен за целата држава.
- Министерство за образование и наука: „Министерството е во постојана комуникација со училиштето и предложивме поддршка во делот на ангажирање дополнителен кадар составен од педагози и психолози, кои ќе им бидат на располагање на учениците во периодот што следи.“
Како индивидуалци и како институции потфрливме со тоа што секогаш реагираме со задоцнување и никогаш не превенираме. Психологот Тијана Ивановска критикува – Национална стратегија кај нас постои, а никој ниту чул, ниту видел како таа се спроведува.
- „Што да правиме кога ќе исчезне некое дете?! Нас нѝ треба стратегија за менталното здравје. Ние имаме Национална стратегија за ментално здравје којашто е започнато да се формира во 2018 година. И што сте слушнале вие за таа стратегија?! Ако ние во Македонија сме свесни дека немаме протоколи и дека едноставно немаме стандардни оперативни процедури како да постапуваме – тогаш ајде да ги направиме. Ајде да истражуваме и да видиме што им недостасува на децата,“ вели Тијана Ивановска – психолог.
Битката против насилството трае и е далеку од добиена. Вака коментира сопругата на претседателот Пендаровски, Елизабета Ѓоргиевска. Убиството на Вања е трагедија која треба да е најсилно предупредување за целата држава.
- „Трагичното случување со убиството на Вања мора да биде алерт дека треба системски, интензивно да работиме на темелните образовни, економски и социјални политики кои ќе ја подигнат свеста за борбата против насилството на сите рамништа. Битката е далеку од добиена,“ рече Елизабета Ѓоргиевска – Сопруга на претседателот Пендаровски.
За две недели, во Скопје ќе се промовира системот за рано предупредување за исчезнати лица. Подготвуван е три години и е по примерот на американскиот „Амбер Алерт“ и српскиот „Најди ме“. Таму ќе бидат вмрежени повеќе институции и други субјекти кои ќе имаат обврска да ја споделат информацијата за изгубена или киднапирана личност.
Петар Догов