Шефот на европската дипломатија Жозеп Борел ги повика земјите да и се придружат на Германија во испраќањето тенкови во Украина, во интервју објавено денеска, откако медиумите објавија дека Данска и Холандија се откажале од испраќање тенкови „Леопард 2“ во Киев.
Земјите мора да испорачаат што е можно повеќе тенкови, што е можно побрзо. Би било многу разочарувачки ако сега, откако го вперија прстот кон Германија што не направи ништо толку долго, тие земји не го сторат тоа, изјави Борел за германската телевизија Феникс.
Повикувајќи се на извори, германскиот дневен весник „Ди Велт“ денеска објави дека холандската и данската влада се откажале од испраќање тенкови „Леопард 2“ во Украина.
Знам дека има стотици тенкови во армиите на ЕУ, од кои некои треба да се обноват, но тогаш треба да го направите тоа и брзо, бидејќи напролет ќе биде предоцна, рече тој.
Холандија соопшти дека не го променила ставот за можното испраќање тенкови „Леопард 2“ во Украина.
