Подобрена е ситуацијата во трите пожари што вчера избувнаа во Грција на три различни локации, едниот во близина Атина, што е речиси изгасен, вториот на островот Тасос, а третиот кај Дојранското Eзеро што од селото Николиќ премина на грчка територија.
Кај Дојранското Eзеро на грчка страна, утрово продолжува гаснењето на пожарот, меѓутоа ситуацијата е подобрена, а интервенираат копнени и воздушни противпожарни сили на Грција.
Шумскиот пожар во Главкади, во северниот дел на островот Тасос, што избувна кусо пред полноќ, се гасне со 62 пожарникари со две пешадиски тима, 20 возила, шест авиони и два хеликоптери, а утрово е значително подобрена состојбата. Според грчки „Екатимерини“, пожарот е на нерамен, тешко достапен терен што ги комплицира напорите за негово контролирање. Активен е на два фронта – еден во областа Гликади на најсеверниот дел на островот, а другиот се движи кон популарното крајбрежно одморалиште Пахис и селото Рахони.
Поради пожарот, дел од островот е без струја.
