Дел од европратениците најавиле дека нема да го поддржат амандманот со кој се бара бришење на зборовите „македонски идентитет“ и „македонски јазик“ во Нацрт-извештајот на Европскиот парламент, тврди премиерот откако трите најголеми политички групации во Европскиот Парламент се договорија да предложат отстранување на овие термини од финалната верзија на текстот. Според него, ова е првпат од осамостојувањето на Македонија, нејзиниот идентитет и јазик да бидат вклучени во ваков документ, а обидите тоа да се избрише ги спореди со „талибански начин на делување“.
Мицкоски вели и дека официјална Софија има јасна цел – со внесување на Бугарите во уставот, ќе ги негира пописните податоци во Македонија и ќе бара соодветна застапеност. Доказ за ова, според него, е и објавената бројка од бугарската влада за 216.000 бугарски пасоши во Македонија, која ја објави бугарската влада, вели премиерот Мицкоски.
Претседателката Сиљановска-Давкова остро ги критикуваше Европскиот парламент и Европската Унија, за сериозен демократски дефицит и уривање на европските вредности.
„Заедничкиот амандман е предложен од европратениците Анджеј Халицки во име на Европската народна партија (ЕПП), Кетлин ван Бремпт во име на Прогресивната алијанса на социјалистите и демократиите (СД) и Дан Барна во име на либералната група „Да ја обновиме Европа“ (РЕ), и со него се предлага бришење на делот од текстот кој гласи: „целосно почитувајќи го македонскиот јазик и идентитет…“, истакнува Силјановска Давкова.
На Извештајот се поднесени дополнителни 28 амандмани, меѓу кои и тој со кој се бара наместо македонска влада, да стои – Влада на Република Северна Макеоднија. Бугарските европратеници повторно имаат и амандман со кој бараат Протоколот со Бугарија да влезе во Извештајот за напредокот на земјата. Тука е и амандманот со кој се предвидува вметнување на зборот „современ“ пред „македонски јазик и идентитет“.
Грчки европратеници, пак, бараат замена на „македонска“ или „македонски“ со „на Северна Македонија“ и „национално наследство“ со „државно наследство“.
Кон Предлог-извештајот е придодадено и т.н. „Малцинско мислење“, предложено од бугарскиот европратник Валчев, кое гласи: „Референцата „македонски идентитет“ треба да се сфати строго и единствено во неговиот современ контекст на идентитетот на луѓето кои имаат чувство на припадност кон одредена група“.
Далиборка Демјанска Цветановска