Препукувањето меѓу трите струмички општини и комунaлните претпријатија околу надлежноста над депонијата Шапкар, екоактивистите го сметаат за несериозно и навреда кон граѓаните. Ѓорги Танушев, активист и независен советник во струмичкиот совет, вели дека граѓаните плаќаат услуга менаџмент и складирање на отпад и не може институциите да се изземаат од одговорност за услуга за која земаат пари.
„Ако сега никој не е надлежен за таа депонија, зошто луѓето со децении плаќале пари за нешто што не било нивна надлежност? – Како тоа за пари земање сме надлежни, а за управување со депонијата не сме надлежни? – Јас знам дека официјално полулегална депонија е само Дрисла во Скопје, но тоа не значи дека не постојат или дека не се наплаќале услуги, токму за тие места, каде што е воспоставена таква услуга, а ние знаеме дека е воспоставена уште од бивша Југославија и сега ќе се правиме дека не сме ние надлежни. Па, кој е надлежен?“, прашува Ѓорги Танушев, советник во Совет на Општина Струмица.
Дел од средствата за комунален отпад мора да се користат за управување со депонијата без разлика дали е легална или не, вели Танушев. Тој ги повика институциите да се коoрдинираат и да се зафатат со решавање на проблемот со депонијата која, речиси, десет дена во низа гори и загадува.
Депонијата Шапкар ја управува струмички Комуналец, а ѓубре депонираат и општините Василево и Босилово. Како и дали ќе се делат дел од надлежностите за неа, засега нема одговор од институциите.
Сузана Мицева