Патници во германски воз биле замолени да го напуштат, откако персоналот проценил дека вагоните се премногу валкани за патувањето да продолжи, соопшти „Дојче бан“.
Станува збор за брз воз на националната железничка компанија „Дојче бан“, кој во вторникот сообраќал од Минхен кон Хамбург. Персоналот, при рутинска проверка, утврдил дека состојбата со чистотата е недозволива за натамошно патување, изјави портпаролка на компанијата за агенцијата ДПА.
На патниците им било наложено да го напуштат возот во Нирнберг, околу 155 километри северно од Минхен.
Жал ни е за оваа ситуација. Очекуваме возовите на долги релации што сообраќаат низ цела Германија да ги исполнуваат високите стандарди за квалитет. За жал, тоа не беше случај со ова патување, изјави портпаролката.
Таа не даде детали за степенот на валканост на вагоните, ниту прецизираше колку патници се наоѓале во возот.
Отприлика еден час по запирањето, на патниците им бил понуден алтернативен превоз, а добиле и информации како да побараат обештетување, додаде портпаролката.
