Проектите, предвидени да се градат од британските пари кои ќе се земаат според договорот со Обединетото Кралство, може да влијаат врз зголемување на јавниот долг и покрај јасното ветување на владата дека долгот ќе се намалува, велат од Фајнанс тинк. Тоа може да се измени преку ново планирање на Фискалната стратегија.
Во владината програма, ветено е одржување на јавниот долг и тој бил стабилизиран на крајот на 2024-та, иако новите заеми може да влијаат. И инфлацијата на крајот на ланската година била во рамките односно дури подобра од ветувањето на владата, но сега повторно расте и допрва ќе се утврдува дали ќе остане на ветеното ниво, вели Петреска.
Четири организации го следеле остварување на ветувањата на новиот кабинет предводен од Мицкоски и во 5 различни области е утврдено дека тринаесет проценти од ветувањата на владата се остварени во првата од 4 години мандат, а уште 37% се започнати. Најлошо е со правата на жените бидејќи ниту едно од 5-те ветувања досега ниту е остварено ниту е почнато да се реализира.
Најдобро пак оди во ресорот образование, целосно реализирани се 9 ветени мерки, а 26 ветувања се отпочнати со реализација. Две од ветувањата не се почнати со реализција, а динамиката во ресорот е најслаба во високото образование.
По направените анкети и истражувања на јавните мислења, граѓаните укажале и дека некои од мерките се спроведуваат, но не како што било ветено. Ова било забележано особено во социо-економските мерки, а во некои случаи владините приоритети се разликуваат од потребите на граѓаните.
Миомир Серафиновиќ