Со оперативен план за вработување тежок 40 милиони евра – Владата ќе ја намалува невработеноста. Со владиниот план треба да бидат опфатени повеќе од 16 илјади невработени лица. Ќе се вработуваат 400 пожарникари и уште 600 невработени граѓани кои треба да бидат ангажирани за јавни работи и општински проекти.
„Од услугите би ги наброил посредување при вработување, помош при барање работа, мотивациски обуки за невработените лица, активација на невработените лица кои се во ризик“, кажа Сељатин Бељули, директор на Агенција за вработување .
Планирани се и грантови за млади до 29 години.
„Во рамки на мерката поддршка за самовработување оваа година имаме нови мерки. Има нова мерка со која оние кои имаат основно образование можат да започнат свој бизнис, а висината на оваа поддршка изнесува седум илјади евра“, објасни Бесар Дурмиши, министер за економија и труд.
Стапката на невработеност во Македонија во последното тримесечје на минатата година изнесува 11,9 отсто и е на рекордно ниско ниво. Од друга страна пак компаниите покрај недостиг на работна сила, која сега се надополнува и со увоз на работници од надвор, загрижени се и за ниското ниво на продуктивност.
Тамара Марковска