Уставниот суд денеска едногласно одлучи да поведе постапка за оценување на стажот на јавните обвинители додека се членови на Советот на јавни обвинители. Обвинителката Ленче Ристовска поднела иницијатива со која го оспорува членот на Деловникот за работа на Советот, кој предвидува дека мандатот на обвинителите во ова тело ќе им се смета како позитивно оценет јавно-обвинителски стаж.
Според подносителката, додека се членови на Советот, обвинителите не вршат јавнообвинителска функција и не може да бидат оценувани, па со тоа мандатот не може да им се смета „позитивно оценет јавно-обвинителски стаж“. Таа тврди дека тоа прашање не може да се уредува со Деловник, бидејќи изворно не е уредено со законски пропис, па излегува дека самите членови си донеле поволности за себе.