На Институтот за македонска литература беа промовирани книгите „ Книжевноста низ критичката визура“ од Ана Мартиноска и „ Уметноста на дијалогот “ од Ана Јовковска. Мартиноска во својата книга, пишувана како духовно спасение во време на корона кризата, прави критичка анализа на дела од македонски и европски писатели од последната декада, за кои смета дека се најдобри. А, пак Јовковска во нејзината книга поместила интервјуа со домашни писатели, направени по повод нивни нови објави. Двете книги, ја истакнуваат ангажираноста да се зборува за деликатни прашања од стварноста, кажа промоторот, Гоце Смилевски.
- И двете авторки имаат една извонредна задача пред самите себе поставено. И која апсолутно ја исполнуваат, можеме да кажеме со големо задоволство . А, тоа е да се детектира ангажираноста на овие дела , во однос на времето кое го живееме, кажа Гоце Смилевски, промоторот на книгите.
- Во неа направив една интимна листа на омилена литература. Тоа се главно дела кои отвораат нови страници на македонската литература и храбро пишуваат за некои нови теми кои ја сензибилизираат јавноста за нов тип ангажирано писмо. И ја разбрануваат конзервативната матрица и каноните, рече Ана Мартиноска, авторка на книгата „ Книжевноста низ критичката визура“.
- Не шетаат низ општеството на спектакал, низ идеолошките затвори , низ книжевните борби, постколонијалниот свет, низ културолошките теории . За да стигнеме до прашањата како што се клаустрофобијата на духот, поданичкиот менталитет, уметничката манипулација , технолошкиот кафез , па дури и еколошката криза, денес, кажа Ана Јовковска , авторка на книгата „ Уметноста на дијалогот“.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.