Пет години по концертот со Македонската филхармонија, српскиот виолинист Стефан Миленковиќ, кој важи за еден од најистакнатите музичари од неговата генерација во светски рамки, за прв пат ќе настапи со нашиот камерен оркестар Профундис.Концертот ќе се одржи во Македонската филхармонија, под диригентство на Ѓурѓица Дашиќ. Програмата што ќе биде изведена , Миленковиќ ја опишува како динамична и виртуозна, а за успесите постигнати на професионален план во изминатите 4 децении, вели дека се плод на неговото работење на себе. За оркестарот Профундис е чест и одговорност што ќе свират со Миленковиќ, кажа диригентката Ѓурѓица Дашиќ.
Светски познатиот виртуоз на виолина од Србија, Стефан Миленковиќ, се враќа пред македонската публика по пауза од 5 години. Тој утре вечер ќе настапи како солист на концертот со нашиот камерен оркестар Профундис, со кој за прв пат ќе свири. За програмата со дела од Сен-Санс, Чајковски, Масне, Бацини, Сарасате и Паганини, што ќе биде изведена во Македонската филфармонија, Миленковиќ вели дека е виртуозна, тешка, составена од т.н. шоу дела.
- Програмата е многу динамична, изискувачка, препознатлива. И мислам дека сите утре ќе чујат зошто тие дела се толку познати, толку тешки, кажа Стефан Миленковиќ, виолинист.
Го паметиме од 80 – тите години на минатиот век како чудото од дете, во бел фрак. „ New York Times“ го нарече вистински виртуоз, а во Србија е прогласен за уметник на векот. Полето на делување Миленковиќ одамна го прошири преку настапи со музичари кои изведуваат друг стил музика што не е класична, а повеќе од 25 години е и педагог. Сѐ што постигнал во кариерата , за што освоил многу награди, Миленковиќ го објаснува како плод на работата на себе.
- Односно, на некое истражување на сам себе и на некаква надградба, на некое подобрување, кажа Миленковиќ.
За него „ Профундис“ е оркестар со творечка енергија, визија и знаење, како да се промовира класичната музика, а за нив е чест и одговорност што ќе го имаат како солист на концертот.
- Ја финишираме концертната сезона на „ Профундис“ , токму со уметник од светски калибар како Стефан Миленковиќ, што за нас претставува привилегија, навистина голема чест и огромна одговорност, кажа Ѓурѓица Дашиќ, уметничката директорка и диригент на „ Профундис“.
Билетите за концертот се распродадени. Тоа значи живот за овој камерен оркестар и нови концерти , во поголема форма и со поголеми дострели, кажа членот на „ Профундис“, Јане Бакевски.
Сотир Трајков