Целосно е прекинато водоснабдувањето во Битола, поради голем дефект на главниот цевковод. Целиот град со часови е без вода после полноќ, откако Пумпната станица остана без струја, што предизвика оштетување на витален дел од водоводниот систем, објаснуваат од Водовод. Испразнета е целата мрежа, се работи на санација на дефектот, но сепак неизвесно е кога повторно Битола ќе добие вода.
-Поради испад од електричната мрежа на Пумпната станица дојде до голем хидрауличен удар на затворачот Ф 500 од потисниот цевковод и настаан голема пукнатина. Со екипите цела ноќ работиме на санирање на дефектот. Станува збор за најзначајниот дел, срцето на Водовод, потисниот цевковод, од каде ја испумпуваме водата од Стрежево и ја носиме до домаќинствата, вели Андреј Гинов, директор на ЈП Водовод Битола
Целосно пресушија и јавните чешми низ градот, а граѓаните се револтирани поради повеќечасовниот прекин на водоснабдувањето побрзаа да купат барем вода за пиење.
-Треба повеќе работа, помалку фалби. Во кој век сме без вода со часови да не остават. Ќе купуваме вода тоа е , барем за пиење и за хигиена да имаме. Еве ќе навалат сега во маркетите ако нема вода во цел град, велат битолчани
Ова лето со чести проблеми во водоснабдувањето се соочува централниот дел од градот и покрај Пелистерските извори и вештачката акумулација Стрежево. Од Водовод тврдат дека станува збор за енормно зголемена потрошувачка и нерационално трошење на водата, порад што повисоките катови од зградите се соочуваат со намален притисок. Но, денеска без вода остана цела Битола поради голем дефект на главниот цевковод.
Емилија Мисирлиевски