Шпанија е нов европски шампион по победата од 2-1 против Англија во вечерашното финале одиграно на „Олимпискиот стадион“ во Берлин, Германија.
„Црвената фурија“ стигна до рекордната четврта титула во историјата, а престолот го освои со неприкосновен ефект, односно со седум победи од седум натпревари.
По едно здодевно прво полувреме во кое немаше ниту една шанса на двете страни, возбудувањата беа резервирани за вториот дел.
Нико Вилијамс го отвори резултатот во 47-та минута за водство на Шпанците од 1-0. Кол Палмер израмни во 73-тата минута за Англија и тоа само три минути откако влезе во игра со прецизен удар од далечина. Победничкиот гол за Шпанија го постигна Микел Ојаразабал по една фантастична тимска акција во 86-тата минута.
Шпанија во петтото континентално финале дојде до четвртата титула и ја остави Германија зад себе со три европски круни. Англија го загуби второто европско финале по ред и по речиси шест децении останува без голема титула. Единственото славје на репрезентативно ниво „Гордиот албион“ го оствари во 1966 година, кога стана светски првак.