Многу од моите колеги си одат, особено оние подобрите, тие што имаат големи успеси во студиите. На најдобрите дури не им е ниту прашање дали ќе останат, исклучоци се оние кои ќе останат. Да бидам искрен, сите размислуваат на таа тема, дали да си одат и никогаш не било сигурно дека ќе седат, рече Александар Ристоски, потпретседател на универзитетско студентско собрание, во вечерашната дебата во „Топ тема“ на ТВ Телма.
„Мислам дека е ОК некој да се отсели, не се пронашол овде или се гледа во странство, но кај нас е масовно и сметам дека ова е прилично голем проблем. Не се двајца-тројца“, рече Ристоски кој е на ФИНКИ.
И условите за живот и финансиите, според него, одат заедно во причините за иселување.
„Едното е каква енергија имате на факултетот, каков мајндсет, но мислам дека и финансиите се многу важни, бидејќи, барем кај нас на ФИНКИ, доколку не е професор, асистент или демонстратор од мали години ако земете некој, ако не му давате доволно финансии, зотшо тој би останал, кога може трипати повеќе во индустрија. Ако немате за основни потреби. Еве на пример, не е само на ФИНКИ, на Правен факултет колку што знам не се плаќаат дел од демонстраторите. Ако немате пари да живеете, нема зошто би работеле“, рече Ристоски.