Судот во Пакистан осуди христијанин на смрт поради споделување, што судиите го протолкуваа како содржина со омраза против муслиманите на социјалните мрежи. Сето тоа се случило по еден од најлошите напади на разгневената толпа врз хриситијаните во источната провинција Пенџаб минатата година, изјави адвокатот на осуденикот. Тој додаде дека ќе поднесе жалба на пресудата.
Групи муслимани запалиле десетици домови и цркви во градот Јаранвала во август 2023 година, откако некои жители тврделе дека виделе двајца христијани како кинат страници од Куранот, ги фрлаат на земја и пишуваат навредливи коментари за нив. Двајца мажи потоа биле уапсени.
Ехсан Шан, иако не бил вмешан во сквернавењето на Куранот, е обвинет за повторно објавување фотографии од обезличени страници на Куранот на неговиот профил на ТикТок, изјави неговиот адвокат Курам Шахзад.
Тој беше осуден на смрт во саботата од судот во градот Сахивал во провинцијата Пенџаб.
Амир Фарук, полицаецот кој го уапси Шан, рече дека мажот споделил „содржини со омраза во чувствително време кога властите веќе се бореле да го задржат насилството“. Навед Кашиф, локален свештеник во црквата во Сахивал, не го оправдува чинот на Шан, но се прашува „зошто судот нареди таква екстремна казна кога оние кои се поврзани со нападите допрва треба да бидат казнети“.
Обвинувањата за богохулење се вообичаени во Пакистан. Според законите за богохулење во земјата, секој што ќе биде прогласен за виновен за навреда на исламот или исламските верски личности може да биде осуден на смрт. Честопати самите обвинувања можат да предизвикаат немири и да ја поттикнат толпата на насилство, линч и убиства.
На пример, на 3 јуни, 72-годишниот Назир Масих почина откако беше нападнат од разгневена толпа под обвинение за богохулење во мај.