Јован Деспотовски денес до Владата ја достави својата оставка од директорското место во ТИРЗ за како што кажа да може да се посвети на политичкото дејствување. За Деспотовски внатрепартиските избори не се завршени бидејќи сеуште нема добиено одговор зошто речиси половина од членовите кои се пријавија за гласање не излегоа во неделата. Тој најави дека нема да биде фракција во СДСМ.
За Деспотовски е нејасно како Централната изборна комисија прогласила победник на внатрепартиските избори иако рокот за приговори не е истечен додава дека тоа фрла дополнителна дамка на процесот. За изјавата дека нема да извршува партиска функција кажа дека ќе ја испочитува откако ќе биде завршен изборниот процес и не кажа дали повторно ќе се кандидира за претседател на СДСМ на следните избори кои треба да се одржат во март следната година.
Избраниот претседател на СДСМ, Венко Филипче, ги отфрли тврдењата на Деспотовски и Петровска и нагласи дека ниту еден од неговите противкандидати не нашол фантомски избирачи меѓу членовите пријавени за гласање.
На внатрепартиските избори кои се одржаа завчера од регистрирани над 23 илјади гласачи, гласаа 12.608 членови или 54 проценти а Филипче освои убедливи 9.052 гласа пред Јован Деспотовски со 2.705 гласа и Александар Бајдевски за кого гласаа 905 регистрирани членови на СДСМ.
Утре во седиштето на партијата ќе се одржи примопредавање на функцијата претседател.
Огнен Чанчаревиќ