Трагедија попладнево се случи на Халкидики, кога гром усмрти 13-годишно девојче, јавуваат грчките медиуми.
Трагичниот настан се случил во 16:30 часот по локално време, кога девојчето било со семејството на песочната плажа Посиди. Според првичните информации, членовите на семејството се разладувале во вода, кога почнало невремето. Набрзо тргнале кон автомобилот, но не успеале да стигнат до него, а ударот на гром бил фатален по животот на девојчето.
Спасувачките служби вложиле натчовечки напори за реанимација, продолжиле со интубација, но не успеале да ја оживеат, јавува грчка Прототема.
Медиумите пренесуваат дека и мајката е полесно повредена. Засега не е позната националноста на девојчето и мајката.
Се нагласува дека времето денеска на подрачјето на Халкидики е лошо, со обилни врнежи од дожд, а полициската управа во Касандра врши прелиминарен увид за инцидентот.