Вработен во американската амбасада во Украина е пронајден мртов во Киев. Телото на неименуваниот аташе на амбасадата било пронајдено во соба во луксузниот хотел „Хилтон“, објави украинскиот портал strana.ua, повикувајќи се на полициски извори.
„Вчера околу 11 часот телото на аташето на американската амбасада е пронајдено во хотелска соба. На телото не се пронајдени траги на насилство. Мажот пристигнал во Украина на 15 јуни. Споиред медицинските податоци кои ги даде амбасадата, тој имал проблеми со висок холестерол“, изјавил извор за strana.ua.
Украинската новинска куќа „Њу војс“ (New voice), исто така, наведе дека немало траги на насилство на телото. Во веста се додава дека вратата на хотелската соба била затворена одвнатре и нагласија оти не е извршена обдукција, а телото било предадено на амбасадата.
Четири неименувани извори во март за „Форин Полиси“ (Foreign Policy) рекоа дека американскиот Стејт департмент планира да распореди 30 до 40 дипломати во амбасадата на САД во Киев. Целта на планот, како што објаснија, е да се овозможи на вработените, вклучително и амбасадорката Бриџит Бринк, да имаат поголема флексибилност во патувањата низ регионот.
„Форин Полиси“ пишуваше дека вработените во амбасадата се преоптоварени, бидејќи се соочуваат со недостаток на персонал среде војната. Американскиот Стејт департмент во моментот ги советува граѓаните на САД да не патуваат во Украина поради „активен вооружен конфликт“.
„Тие кои ќе одлучат да останат во Украина, треба да бидат внимателни поради можноста од воени напади, криминал и граѓански немири. Безбедносната ситуација во Украина останува непредвидлива. Постојат континуирани известувања за руските сили кои издвојуваат граѓани на САД во украински подрачја под руска окупација поради притвор, испрашување или малктретирање поради нивната националност“, тврди Стејт департментот.