„Северна Македонија: Новата Влада положи заклетва под уставното име откако доби доверба од Собранието“; „Мицкоски: Го карактеризираше „срамен“ терминот „Северна“ во уставното име на неговата земја“; Северна Македонија: Изгласана доверба од Собранието за новата Влада на Мицкоски“; „Владата на Мицкоски доби доверба – Заклетва со уставното име на земјата“, се дел од насловите на текстовите во грчките медиуми за синоќешното гласање на новата Влада.
Медиумите во Грција акцентот го ставаат на тоа кое име го користеше новиот премиер, како за време на заклетвата, така и во неговиот говор во Собранието, а во главно, пренесен е текстот од грчката новинска агенција АНА-МПА.
АНА-МПА пишува дека Владата беше изгласана со 77 гласа за и 22 против, а на свечената заклетва што следеше, „и Христијан Мицкоски и министрите од новата Влада положија заклетва согласно уставното име на земјата Република Северна Македонија“, а во продолжение го пренесува целиот текст од заклетвата, прочитан од претседателот на Собранието и повторен од премиерот и министрите.
Христијан Мицкоски, во неговото обраќање, кусо пред гласањето доверба на неговата Влада, оправдувајќи го својот избор да положи заклетва како премиер на Северна Македонија, ја карактеризираше како „срамна“ одредницата „Северна“ во уставното име на неговата земја, но која, како што рече, сега е дел од правниот систем на земјата и со која, како што додаде, „ќе направи компромис“, пишува грчката новинска агенција.
Грчките медиуми во изминатиот период детално и будно ги следат случувањата кај нас, а речиси секогаш во фокусот е употребата на уставното име.
Во саботата во текстовите за почетокот на собраниската седница за доверба на Владата и говорот на Мицкоски, пишуваа дека новиот премиер „трипати ја нарече неговата земја „Македонија“, коментирајќи дека е „нова провокација“.