Не успеаја повторно да седнат во собраниските фотељи, но плата ќе им тече оттаму уште цела година. На 29 пратеници од минатиот парламентарен состав, кои побарале апанажа, денеска им беше одобрено да останат и понатаму на државна плата.
Меѓу оние кои побарале да го остварат правото на плата по престанок на функцијата, се екс-пратениците од СДСМ, Дарко Каевски, Мартин Костовски, Диме Велковски, Марија Георгиевска, Ненад Коциќ, Жаклина Лазаревска, Даниела Колева, Лолита Ристова, Марија Костадиновска, Марија Кочовска, Соња Михајловска, Емилија Рамбабова, Санела Шкриељ и други.
Од ВМРО ДПМНЕ апанажа побарале Игор Јанушев,Марија Ангелова и Мирче Аџиоски. На овој список се и Маја Морачанин од ДОМ, Боби Мојсоски од ЛДП, Љупчо Балковски од ВМРО Народна, како и Кастриот Реџепи.
Екс пратеникот Мирослав Јовановиќ, ќе прима апанажа само два месеци до пензионирање, а по истиот основ и Абдула Салиу -шест месеци и Ремзи Мехмеди – девет месеци. Поднесени се и други барања што се разгледуваат, а рокот за пријавување завршува на 28 јуни.
Комисијата денеска ги екипираше и двете комисии, низ кои треба да поминат реформските закони поврзани со промените во министерствата. Со овие работни тела, по деловник претседава партијата со најголем број на пратеници, оттаму, на чело на Законодавно правната комисија ќе биде Александар Велјановски од ВМРО-ДПМНЕ, а на Комисијата за политички систем, Љупчо Пренџов.Со ова, се отвора патот за закажување на седница, на која треба да се расправа за новите закони кои ги предлагаат од ВМРО ДПМНЕ, а со кои треба да се направи реконструкција на владините ресори.
Членовите на комисијата денеска го прифатија и барањето на поранешниот претседател Стево Пендаровски за мирување на правото на пензија.Пендаровски веднаш по изборите соопшти дека нема да ја користи пензијата што по закон му следува како поранешен претседател и најави дека се враќа како професор на Американ колеџ. За тројца вработени од својот претседателски кабинет, побара од државата просторија и работен ангажман за подготовка на учество на настани во земјава и светот кои ќе ги има како поранешен шеф на држава
Далиборка Демјанска