Жителите на општина Сарај ќе треба да бираат нов градоначалник.
Блерим Беџети од вчера е пратеник на „Европскиот фронт“ со верификуван мандат.
За разлика од него Билал Касами одбра да остане градоначалник на Тетово иако беше носител на кандидатската листа на “Вреди” и освои пратенички мандат.
По изборот на Владата ќе се знае дали уште некоја општина ќе остане без својот прв човек.
Речиси е сигурно дека градоначалниците на Гостивар и на Аеродром, Арбен Таравари и Тимчо Муцунски ќе станат министри.
Со тоа, ќе биде неопходно и во овие општини да се организираат предвремени избори.
Според Изборниот законик, локални избори се одржуваат во втората половина на октомври секоја четврта година.
Предвремени нема да се спроведат доколку до редовниот термин има помалку од шест месеци. Редовниот термин за наредните избори доаѓа во октомври 2025-та, што значи по година и 5 месеци, па оваа година треба да се очекуваат избори за градоначалник во неколку општини.
Освен ако Владата не предложи менување на овие одредби како дел од измените на Законот за органите на управата.