Косење на тревата веднаш побара техничкиот премиер Талат Џафери – градоначалничката Арсовска му порача сам да си го уреди сопствениот дом. Џафери освен првиот човек го повика и јавното претпријатие „Паркови и зеленило“ кое е под капата на Град Скопје да го среди дворот на зградата.
Од ВД премиерот од Форино, што кога излегува од дома до Влада ги гаси попатно сите семафори и прави хаос, не е ни очекувано да знае што е негова обврска обвини Арсовска.
ЈП “Паркови и зеленило” ги одржува градските булевари и паркови површини кои се надлежност на претпријатието согласно Закон, а ако сака ВД премиерот Талат од Форино да ги ангажира да работат во Влада за истото треба да си склучи Договор, исто како и секоја друга институција во Македонија, изјави градоначалничката на Скопје.
Израснатата трева од половина метар во дворот и околината на Владата денеска предизвика расправии помеѓу техничкиот премиер Талат Џафери и градоначалничката Данела Арсовска. Дворот на Владата и нејзиното поблиско опкружување подолг период е обраснат со трева.
Симона Петровска
