Неколку часа по објавените информации за неговото пристигнување на Конгресот на СДСМ и прашањето на Телма за автомобилот пасат со кој дојде, министерот за земјоделство, шумарство и водостопанство објави пост на Фејсбук, со наслов “Демант за невистините изнесени против мене!”
Во продолжение ФБ објавата на Николовски: Во врска со објавите на ТВ Телма дека на партискиот Конгрес сум пристигнал со службено возило, одговорно тврдам дека посоченото возило не е службено возило во сопственост на Министерството за земјоделство, шумарство и водостопанство, ниту на Службата за општи и заеднички работи на Владата, туку дека станува збор за рент а кар возило.
Министерството за земјоделство, шумарство и водостопанство навремено, уште пред истекот на законски рок од Изборниот законик и Законот за спречување на корупцијата и судирот на интереси, ја има исполнето својата обврска и до Државната комисија за спречување на корупцијата има доставено податоци за бројот, видот, регистарските таблички на сите моторни возила со кои располага Министерството за земјоделство, шумарство и водостопанство.
Токму на мој предлог, како вицепремиер во Владата, беше донесена одлука за начинот на користење на службените возила, чија цел е да се спречи злоупотребата, а службените возила да се користат наменски за извршување на работни активности.
Секогаш сум на страната на вистината, и во интерес на точно информирање на јавноста.
Николовски реагира на информацијата во која тој е прашан и одговара наведувајќи дека е лага без да спомне рент-а-кар и бара броеви на таблички и други податоци од новинарите кои го прашуваат.
Дополнително, во базата на регистарот на службени возила и натаму ги нема оние кои се пријавени од Министерството за земјоделатво, шумарство и водостопанство.