Советот при Врховниот суд откако ги разгледа поднесените барања за вонредно преиспитување на правосилна пресуда, по предметот за убиството на хрватскиот ракометар Денис Тот, донесе одлука со која истите ги одби како неосновани и ги потврди изречените казни од 18 и 16 години затвор.
Претходно, Апелација ги потврди казните на сите осудени во случајот.
Првообвинетиот Анџело Ѓорѓиевски издржува 18 години. Второобвинетата Клементина Лефковска исто така издржува 18 години затвор. И на третообвинетиот Андреј Костовски му е потврдена казната затвор од 16 години.
Пресудата за Денис Тот од Кривичен беше изречена во ноември 2022 година. Обвинетите негираа вина за делото убиство. Тие бараа да им се суди за тепачка.
Судскиот процес траеше два и пол месеци, а беа сослушани голем број сведоци на настанот, како и вештаци. Клучни беа и снимките од видеонадзорот пред клубот, пред кој Тот беше убиен, но и оние од градските камери.