Македонија ја заврши 2023 година со инфлација од 9,4 отсто, соопшти државниот Завод за статистика. Најмногу поскапеле храната, угостителските услуги, мебелот, покуќнината. Забележан е зголемен трошок кај воздухопловниот транспорт, туристичките аранжмани, облеката, фармацевтските производи.
За декември лани, споредено со декември 2022-та година, инфлацијата е 3,6 отсто. И тука најмногу поскапеле прехранбените производи, зеленчукот, кондиторските производи. Во обид да ја заузда инфлацијата, државата ги замрзна цените на основните прехранбени производи и мерката ја продолжи до крајот на јануари.
Некои цени останаа замрзнати на нивото од август, а некои како што биле во септември. Владата очекува инфлацијата годинава да се стабилизира, но меѓународните финансиски институции предупредуваат дека и годинава се можни ценовни шокови.