Делегацијата на Европската унија со загриженост ги следи случувањата околу М-НАВ.
Оттаму велат дека императив е именувањата во националниот давател на услуги за воздухопловна навигација и поврзаните услуги, исто како што треба да важи и за другите институции, да се засноваат на заслуги, квалификации и искуство.
Потсетуваме на фактот дека Северна Македонија се обврза да го имплементира законодавството на Европската унија што се однесува на давателите на услуги за воздушна навигација.
Ова вклучува одредби со цел за да се обезбеди независност на давателите на услуги за воздушна навигација од државата, дека персоналот – особено контролорите на летање – ги исполнуваат законските барања за такви работни места, и дека обезбедувањето на услугата ги почитува целите во однос на безбедноста, економичноста, капацитетот и животната средина, соопштија денеска од делегацијата на Европската унија во Македонија.
Оттаму очекуваат државните власти брзо да ги истражат наводите за кронизам во вработувања во овие служби.
Исто така, од делегацијата на ЕУ очекуваат државните власти да ги истражат несоодветните надворешни влијанија, како и насилство врз персоналот што работи во М-НАВ.
Претседателот на синдикатот на контролори на летање, Александар Тасевски, пред неколку дена беше повикан во седиштето на делегацијата на Европската унија во Скопје на разговор околу обвинувањата на синдикатот за несоодветни вработувања во македонска навигација.