Во акција на полицијата на три локации низ државата најдени се 99 жени кои биле користени најверојатно за забава и танцување иако ниту сопствениците на локалите немале соодветни дозволи за такви активности ниту жените имале работен престој.
Девојките во Македонија пристигнале од 10 различни држави на три различни континенти, а имало и девојки кои се од Колумбија, Аргентина и Казахстан. Полицијата наведува дека против сопствениците на објектите каде девојките работеле ќе поднесе соодветни пријави.
Полицијата најави и дека за жените кои не престојувале во државата со соодветни работни дозволи и пријави ќе отпочне прекршочна постапка, која речиси по правило завршува со протерување на девојките од кои е можно некои да биле и жртви на трговија со луѓе.
Целосното соопштение на МВР за акцијата:
На 04/05.01.2024 Националната единица за сузбивање на криумчарење мигранти и трговија со луѓе при Сектор за криминалистички истраги во Одделот за сузбивање на организиран и сериозен криминал, по добиени наредби за претрес од Основен кривичен суд, Скопје, извршени се претреси во три угостителски објекти, од кои два на подрачјето на СВР Тетово и еден на подрачјето на Охрид. При спроведените полициски и истражни дејствија во трите угостителски објекти биле затекнати вкупно 99 женски лица со потекло од Украина, Русија, Белорусија, Албанија, Косово, Колумбија, Србија, Аргентина, Бугарија, Казахстан и Р.Северна Македонија, кои престојувале спротивно на целта, а пронајдена е една ќеса со прашкаста материја и еден пиштол „Гамо“ калибар 4,5 мм. Во угостителскиот објект сопственост на И.И.(26), биле затекнати 50 девојки од Украина, Русија, Белорусија, Албанија и Косово, како и ќеса со дрога. Во угостителскиот објект, сопственост на А.Џ.(26), беа затекнати 36 девојки од Украина, Русија, Белорусија, Албанија, Колумбија, Србија, Аргентина, Бугарија и Северна Македонија, а пронајден е и пиштол. При претресот извршен во угостителскиот објект во Охрид, сопственост на Х.А.(34), биле затекнати 13 девојки од Украина, Русија, Белорусија, Казахстан и Северна Македонија. Во однос на затекнатите женски лица кои престојувале спротивно на целта ќе се отпочне со прекршочна постапка пред надлежен суд, а против сопствениците ќе бидат поднесени соодветни поднесоци.