Утре модуларната терапија за болните со цистична фиброза ќе ја добијат уште двајца пациенти. 32 годишниот Игор, кој прв алармираше во медиумите за потребата од лекот Трикафта и чекаше повик од докторите за да ја добие терапијата, вчера го добил долгоочекуваниот повик од докторките од Пулмологија. Тие му кажале дека наскоро ќе ја добие терапијата на нивната Клиника, но не добил прецизен датум кога ќе почне да го прима лекот кој ќе му го продолжи животот. Игор смета дека таму нема соодветни услови и бара да биде сместен на Клиниката за детски болести каде што условите се подобри и таму се лекуваат останатите пациенти заболени со цистична фиброза, но, обвинува дека таму нема место затоа што лекуваат пациенти кои немаат цистична фиброза.
„Сите пациенти го примаат лекот на детската клиника како што и беше најавено. Со тоа што ме повикаа на Клиниката за пулмологија сметам дека повторно сум дискриминиран. Добро знам дека сите останати пациентите што го примија лекот се повеќе од 36 години, а се третирани во добри услови на детската клиника. како што тие беа третирани така сакам и јас“, изјави Игор Пехчевски, пациент со цистична фиброза.
Од Клиниката за пулмологија ги демантираат обвинувањата на Пехчевски.
„Не е вистина дека само Пехчевски е повикан да ја прими модуларната терапија кај нас. Досега двајца пациенти се лекуваа тука и немаа поплаки за условите. Пациентите се поделени по клиники според возраста и уште од почетокот знаеа кои се условите и ги прифатија. Обвинувањата на пациентот не се точни, пласира многу невистини во јавноста. Ние се трудиме за сите пациенти максимално затоа што нивните животи се еднакво важни за нас“, изјавија од Клиника за пулмологија.
Во Македонија има околу 140 пациенти со цистична фиброза, од нив лекот Трикафта како терапија им одговара само на 55 кои се над 12 години. Досега терапијата ја добија 16 пациенти, а до крајот на годината се планира етапно да се вклучат уште пациенти.
Тамара Марковска