Кој тргувал со цитостатици и кој ги загрозил животите на најтешките пациенти?! Ова прашање досега не е одговорено и сѐ уште нема ниту осомничени лица.
Министерот за здравство денес повторно ги прозва истражните органи да се произнесат, по повеќемесечната истрага.
„Околу тоа што се случи, скандалот со Онкологија, денеска пак ќе ја искористам приликата да го повикам Обвинителството јасно и гласно да излезат со име и презиме. Ако некој се огрешил пред законите на државата, да одговара и да ги сноси последиците“ изјави министерот за здравство, Фатмир Меџити.
Товарот на Клиниката за онкологија е преголем, признаваат здравствените власти. Наплив на пациенти, преполна амбуланта, но и загубена доверба по скандалот кој ја потресе јавноста.
Тоа бара реорганизација, болници во другите градови да преземат дел од пациентите и оддели да се отворат онаму каде што ги немало досега.
„Почнавме да дисперзираме. Вчера беше и директорот на болницата ‘8-ми септември’ кај мене во кабинето и зборувавме да започнеме со таа конзервативна терапија. А, тоа е малку сензитивна работа, не можеме за неколку дена или недели да започнеме, потребен е едуциран кадар. Размислуваме да отвориме во Штип и Битола, за акцелераторот, радиотерапијата да ја ставиме во функција. Утре одиме во Тетово и таму отвораме оддел за онкологија“ додава министерот Меџити.
Истрагата сѐ уште е во тек, а од опозицијата постојано се јавуваат со критики за случајот, но и менаџирањето на системот.
Вчера на собраниската седница на Комисијата за финансирање и буџет пратеници од ВМРО-ДПМНЕ критикуваа дека е одбиен амандман за 20 милиони денари со намена за подобрување на условите во Клиниката за радиотерапија и онкологија.
Петар Догов