Рекламните паноа ги сокриваат оштетувањата на мостот во Визбегово, кој полека се распаѓа и станува опасен за движење. На тротоарот на мостот има огромна дупка во која стои старото железо од арматурата уште од кога е направен мостот, а низ дупката се гледаат возилата кои минуваат под него. Коцките бетон од кои е направен мостот почнале да се вадат. За опасноста на минувачите под мостот алармираше и директорот на Центарот за управување со кризи Ангелов.
„Оваа коцка е само на 30-40 сантиметри од ивицата на мостот и може да падне на улица. Доколку оваа коцка падне врз возило кое што минува под овој мост некој може да биде убиен. Дали треба да чекаме некој да загине, да биде тешко повреден или изваден од памет? – Може да биде исплашен доколку коцката падне на совозачкото седиште и тој излета со кола и удри во ѕидовите на мостот. Но, не е само оваа коцка, овде имаме втора, трета, четврта“, изјави Стојанче Ангелов, директор на Центар за управување со кризи.
Надлежните од општина Бутел и град Скопје кои се задолжени за санација на мостот молчат.
„Пред извесно време побаравме да дојдат претставници од општина Бутел и град Скопје, но не дојдоа. Затоа повикувам нека дојдат. Јас повторно по не знам кој пат ќе отстранам неколку коцки, но ова не е решение“, додаде Ангелов.
Градежна механизација за да работи на овој проблем нема, но поминуваат низ овој мост и работат на друго место. Ова е доста фреквентно место во близина има маркет и во двата правци постојано има коли. Собраќајни знаци за опасност стојат и во близина на мостот каде има друга дупка. Надлежните додека да најдат вистинско решение поставиле ограда за да не може таму да поминуваат пешаци. Оградата веќе почнала да рѓосува и да ја обраснува трева.
Тамара Марковска