Цитостатици изнесувани во торбичка, пренесувани од едно до друго место без покритие, одлеани милиони. Низа обвинувања изнесе претседателот на опозициската ВМРО-ДПМНЕ, од партиската говорница.
Со повеќе листови во рацете за кои Мицкоски тврди дека се добиени од свиркачи, тој вели – се губат животи поради криминал и корупција.
Лидерот на опозицијата обвинувањата ги базира на Извештај од ФЗО, за извршена вонредна финансиска контрола на условниот надоместок на Онкологија, кој го опфаќа периодот од 1 август 2021 година, до август 2023.
„Во еден од договорите пишува дека лекот не смее да биде во средина каде што температурата ќе биде помала од два Целзиусови степени и поголема од осум Целзиусови степени. Дали ова е организиран шверц?! Зошто никој не го отвори прашањето – која е цената по која УК за Онкологија ги наплаќа своите услуги од Фондот за здравствено осигурување и која е цената којашто пациентите ја плаќаат за аплицирање на овие лекови во други здравствени установи? Дали станува збор за двојна наплата?“ вели Христијан Мицкоски, претседател на ВМРО-ДПМНЕ.
Од Обвинителството се огласија со соопштение и велат дека таков извештај кој го опфаќа посочениот период на пресконференцијата воопшто не постои.
Изнесените информации ги оценија како погрешни и дополнија дека во рамки на предистражната постапка ги обезбедиле сите извештаи од вонредните надзори од 2015 година, па сѐ до март годинава.
„Не станува збор за документи од свиркачи, туку за официјални документи од државни органи достапни на истрагата. Нов тримесечен извештај за периодот до јуни 2023 година, согласно информациите добиени од Фондот, е во финална фаза на изработка и веднаш потоа ќе биде доставен до обвинителството. Нагласуваме дека не постои и воопшто не е изготвен извештај што го опфаќа периодот до август 2023 година“ се вели во соопштението на ОЈО.
Во меѓувреме, од владејачката СДСМ, на лидерот на опозицијата му порачаа да не врши упад во истрагата.
„Ако навистина има докази Мицкоски треба да ги поднесе до надлежните институции, а пред сѐ до надлежното Јавно обвинителство. Од каде знае Мицкоски дека овие информации веќе не се дел од истрагата?! Јавно објавување значи директно загрозување на истрагата за Онкологија. Прикривање докази исто така е кривично дело“ вели Ненад Коциќ од СДСМ.
Пред два дена како сведок на Комисијата беше актуелната директорка на Клиниката за Онкологија.
Одговарајќи на прашање таа потврди дека е давана терапија за да се аплицира во приватни болници заради подобри услови, но смета дека таа пракса не е добра.
„Била издавана терапијата да се прими во подобри услови или еве да кажеме во приватна здравствена институција. Ние можеби не можеме наеднаш и во целост да ја исклучиме таа пракса меѓутоа колегите се замолени од моја страна, таквата практика да се редуцира“ кажа д-р Клисаровска, директорка на УК за онкологија, во својот исказ на Анкетната комисија пред два дена.
ВМРО-ДПМНЕ бара да се прошири мандатот на Анкетната комисија за Онкологија и да се опфати и периодот споменат во извештајот, сѐ до август годинава.
Петар Догов