Кадровски промени на две скопски клиники. Министерот за здравство Фатмир Меџити назначи нови медицински директори на клиниките за кардиологија и за дерматовенерологија
На местото на др Жан Зимбаков, за нов медицински в.д. директор на Клиника за кардиологија е назначен д-р Беким Поцеста, специјалист по кардиологија, кој од 2005 година е вработен на Клиниката за кардиологија на одделот за интензивно лекување, како и во службата за електрофизиологија и имплантација наелектростимулациски уреди.
Во 2019 година се стекнал со звање примариус, а има искуство и како директор на УК за кардиологија од јули 2017 до февруари 2018 година, стои во соопштението од министерството за здравство.
На местото на проф д-р Сузана Николовска на Клиника за дерматовенерологија за в.д. медицински директор е назначен д-р Дејан Филиповиќ, кој од 2018 година е вработен на оваа клиника како специјалист дерматовенеролог и асистент по дерматовенерологија при Медицинскиот факултет во Скопје.
Тој, во моментот е докторанд на клиничка медицина, во областа дерматовенерологија, на Универзитет „Кирил и Методиј”, член на Здружението на дерматовенеролози на Македонија, како и член на Европската академија за дерматологија и венерологија, информираат од здравство.