Потпретседателот на Српска листа, Милан Радоичиќ, призна дека ја организирал и спровел акцијата во селото Бањска. Во изјава која ја прочита неговиот адвокат, Радоичиќ тврди дека целта на акцијата била охрабрување на српскиот народ на Косово да му пружи отпор на теророт на режимот на Курти. Поднесувајќи оставка од партиската функција, Радоичиќ соопшти дека целата операција ја организирал лично тој, без знаење на Белград, затоа што од претходно имале несогласувања за тоа како отпор треба да пружат Србите.
Ги известувам сите дежурни прогонители на Српскиот народ, од Курти па се до неговите многубројни странски поддржувачи, дека лично ги направив сите логистички подготовки за одбрана на нашиот народ од окупаторот. А, овој мој чин немаше никаков друг карактер, или намера, и нема никаква врска со мојот претходен политички ангажман, ја прочита изјавата на Радоичиќ неговиот адвокат Милан Петронијевиќ.
Радоичиќ вели дека загинувањето на косовскиот полицаец не било со намера, а после тоа започнала жестока престрелка во која покрај полицаецот, животот го загубиле и тројца нивни другари. Порача дека тие не се терористи, како што ги смета косовската власт, туку борци за слобода.
На сите нека им биде јасно дека ние не сме никакви терористи, туку борци за слободата на сопствениот народ, порача Радоичиќ.
Признанието на Радоичиќ доаѓа откако веќе неколку денови косовските власти објавуваат докази за неговата улога во, како што го нарекуваат, терористичкиот напад во Бањска. Веднаш по повлекувањето на вооружената група од манастирот над селото, министерот за внатрешни работи Џелал Свечла објави дека биле пронајдени негови лични документи, а ден подоцна објави и видео снимка од беспилотно летало на која се гледаше Радоичиќ заедно со другите припадници од групата.
Во најсериозниот вооружен инцидент од прогласувањето на независноста на Косово, загина еден полицаец а повредени беа двајца други. Од вооружената група која се судри со косовската полиција беа убиени тројца Срби, додека еден беше повреден. Тројца беа уапсени и тие се товарат за тешки дела против уставниот поредок на Косово и организирање терористички напади.
Игор Трајков